ಚಂದಿರ

ಸುನೀತಾ ಅವರ ಪರವಾಗಿ ಇಲ್ಲಿ ಹಾಕಿದ್ದೇನೆ

ಚಂದಿರ ನಿನ್ನಯ ಚೆಲುವನು ಬಣ್ಣಿಸೆ ಪದಗಳು ಎನಗಿಲ್ಲ
ನಿನ್ನಯ ಬೆಳಕನು ಎಲ್ಲೆಡೆ ಚೆಲ್ಲುವೆ ಚಿತ್ರಿಪರಾರಿಲ್ಲ ||

ದಿನದಿನ ಬೆಳೆಯುತ ಬೆಳಕನು ಚೆಲ್ಲುತ ಬಾನಲಿ ನೀನಿರುವೆ
ನಿನ್ನನೆ ನೋಡುತಲಂದವ ಸವಿಯುತ ರಜನಿಯ ನಾ ಕಳೆವೆ ||

ಒಂದೆಡೆ ನಿಲ್ಲದೆ ಅಲ್ಲಿಂದಿಲ್ಲಿಗೆ ಸರಿಯುವೆ ನೀನೇಕೆ?
ಮೋಡಗಳೊಂದಿಗೆ ಓಡುವ ತೆರದಲಿ ಕಾಣುವೆಯದು ಏಕೆ? ||

ತಾರೆಯು ಸಾವಿರ ಮಿನುಗಲು ಬಾನಲಿ ನಿನಗದು ಸಮವೇನು?
ನೀನೊಂದಿಲ್ಲದ ಬಾನದು ರಸಿಕಗೆ ಸವಿಯಲು ಬಹುದೇನು? ||

ದಿನಕರನುದಯಿಸಲಡಗುವೆ ಎಲ್ಲೀ ಹಗೆತನ ನಿನಗೇಕೆ?
ಹಗಲೊಳು ನಿನ್ನನು ಕಾಣುವ ಭಾಗ್ಯವದಿಲ್ಲವು ನಮಗೇಕೆ? ||

ತಂಪನೆ ಕಿರಣವ  ನೀಡುವ ನಿನ್ನನು ಕುಮುದಿನಿ ಬಯಸುವುದು
ಹುಣ್ಣಿಮೆ ಬೆಳಕನು ಚೆಲ್ಲಲು ಚಂದದಿ ಸಾಗರ ಉಕ್ಕುವುದು ||

ಬೆಳ್ಳಿಯ ಚಂದಿರ ನಿನ್ನಯ ಚೆಲುವಿಗೆ ಹೋಲಿಕೆಯೇನಿಲ್ಲ
ನಿನ್ನಯ ರೂಪವ ಸವಿಯದ ಮನುಜರು ಭೂಮಿಯ ಮೇಲಿಲ್ಲ ||

- ಸುನೀತಾ